الفراغ

الفراغ  شيء قاتل للروح و العقل و الجسد
الفراغ تعريفه/ أنك تجلس يومك كله بأكملة من غير ما تعمل اي نشاطات او ممارسة هوايات و الخ
بالعامي كدا كأنك سيارة من غير وقود
تصحى الصباح تفكر ايش تسوي ,تجلس تقلو ما عندي شي بعدين تجلس تعيش في احلام اليقظة لساعات طويلة او ترجع تنام
لساعات طويلة .
الفراغ يصحبة سم قاتل الا و هوه الأكتئاب و مرض الأكتئاب
منتشر عالميا كل الناس من كل الاجناس و الاعراق و الاديان تصاب فية,و من أهم اسببه الفراغ طبعا يوجد مسببات اخرى للأكتئاب كالحزن الشديد على فراق احد ,البعد عن الوطن,عدم الرضاء الوظيفي,مشاكل عائلية ,تواجهه أزمات مالية, عدم الاستقرار و اشياء كثير حتى الحوامل و الامهات الي يولدوا يجيهم الأكتئاب

لكن مو شرط كل الناس الي تمر في بعض من هذه الظروف الصعبه تصاب بإكتئاب  و هوه لة عدة مستويات و أهمها الاكتئاب الحاد و هنا لازم الواحد يراجع دكتور نفسي و ممكن يوصف له علاج او يعمل معاه جلسات
اليوم بالآخص أخترت إني ادون عن الفراغ
لآنو هوه اكثر شي إحنا كفتيات سعوديات منتشر بيننا
أنا ما راح اقول اسباب الفراغ بسبب عادات و تقاليد لأنو اشوف هذا امر ماله اي دخل بالعادات و التقاليد الي اتربينا عليها ,الفراغ احنا نجيبه لنفسنا ابتداءا من الجلسه فالبيت ما نحرك ساكنا ,امهاتنا او الخادمات يقوموا بأعمال المنزل من طبخ تنظيف و الخ و احنا كبنات جالسين على التلفزيون نقلب من قناة لقناة و ناكل و نشرب و على قول ماما (اكل و مرعى و قلة صنعه) راح تقولي جلسة التلفزيون افيد من اني ما اسوي شي راح اقولك ابداء مو مفيدة التلفزيون كثرة المشاهده فيه تسبب غباء و تقلل من حركة جسمك و بالتالي تقل حركة الدورة الدموية  و تضعف النظر و الجلسة الكثيرة تسبب تراكم فالدهون خصوصا دهون الكرش يعني من الاخر
التلفزيون مو حل لقتل الفراغ و لا حتى الجلسة على الانترنت او الجوال مفيدة
طيب ايش أسوي اذا انا أعاني من هذا الفراغ ؟!
جيبي ورقة و قلم
أكتبي فيها اسمك ,متى اتولدتي و أكتبي ايش نفسك فيه اي شي
ثم جوابي على هذه الاسئلة
ايش هدفك من الحياة؟ غير العبادة
ما عندك هدف طيب
أكتبي ايش تحبي فالحياة
ايش نفسك تجربي
و دايما كل سوأل لمن تجاوبي عليه اسئلي نفسك ليش يعني
ايش هدفك من الحياة , جوابك :ابغا اساعد الناس افقراء طيب ليش اساعدهم و كيف و عشان ايش اساعدهم
بعد ما تحددي اهدافك و احلامك سويلهم خرائط ذهنيه و اكتبي الخطوات كيف راح تنجزيهم
طيب لنفرض ما عندك هدف خلاص نهاية الدنيا؟؟؟؟؟؟؟
حتقولي ايوا , انا راح اقولك لا
الفراغ اذا ما اتملى بشغلك على أهدافك و احلامك تقدري تقتليه بمواهبك الي ربي اعطاكي هيا ,كل واحد ربنا اعطاه موهبه و يا سلام لمن تكوني تعرفيها , ليش ما تشتغلي عليها؟؟
تحبي الرسم؟ طيب روحي اشتري كراسة و الوان و جلسي ارسمي , طيب ما تعرفي ترسمي ادخلي النت شوفي فيديوهات دروس و الخ اتعلمي منها او روحي معهد
تحبي الطبخ؟؟ ادخلي المطبخ مع مامتك و لا اعملي لنفسك تحدي مثلا 10 طبخات تسويها و حددي اليوم و الوقت المناسب انك تسويها و ادخلي المطبخ و جربي , ما تعرفي تطبخي ,النت و عمو قوقل الكتب فالمكتبات تبع الطبخ ,تحصلي كل شي انتي تبغي
من الاخر كدا ما في شي اسمو ما اعرف كيف ابداء او صعب
شيلي كلمة صعب من قاموس حياتك
طيب ما عندك موهبه او لسى ما اكتشفتيها
اتحركي و اعملي رياضة مو شرط تكوني سمينة عشان تعملي رياضة ,الرياضة لكل الناس و الاجناس نحيف طويل قصير سمين الخ
المثل يقول (فالحركة بركة) , تعرفي انو المشي يعتبر دواء للناس الي معاهم إكتئاب و ضغوط نفسية , و السبب  أنو الدورة  الدموية بتتحرك جسمك يفرز هرمونات السعادة ,عقلك يتحفز و جسمك ينشط و الخ الخ الخ الرياضة لها فوئد مالها اي حصر
 حتى الرقص يحفز هرمونات السعادة في جسمنا خخخخ
ما تبي تعملي رياضة شايفتها صعبه عليكي ,اتحركي فالبيت ساعدي امك خدامتكم سوي اي شي اي نشاط فالبيت يا شيخة لو تروحي تغسلي سيارة ابوكي  ولا تسقي زرع بيتكم
ما تبغي اتعلمي اشياء جديدة في حياتك , زي تعلم لغات جديدة ,شفتي معلومة علمية او صحية و عجبتك أو اثارت اهتمامك اعملي عنها بحث و اتعمقي فيها
خلاص كدا خلصنا طبعا لا
بعد ما تحددي ايش بغي بالزبط ,افتحي ورقة ثانية و سويك جدول يكون اسبوعي يومي او على حسب وقتك
تبيني فيه و تكتبي فيه كل نشاطاتك من يوم تصحي الين ترجعي تنامي و علقي جدولك و حطي تنبيه في جوالك عشان تتحمسي انك تسويه و للحماس لزيادة كافئي نفسك ما في احلا من مكافئة النفس كل ما تنجزي شي محترم كافئي نفسك اقلها تجيبي ورد لنفسك ايوا وردة , أتذكري ما في احد يحبك كثير اكثر من نفسك لو حبيتي نفسك نفسك راح تحبك(جملة شيمو من مدونة قورجس)
خليكي شخص تفكيرة اجابي و صاحبي بنات ايجابيات و تابعي ناس ايجابيين سواء في تويتر فيس بوك في حياتك الشخصية الخ
خليكي محاطة بشمعة الايجابية أنظري الي الجانب المشرق
ما في شي اسمو صعب و لا بداية سهله كلو يعتمد عليكي و على مدى صبرك و مدى تحفيزك
طبعا اكيد سئلتي نفسك ليش الاء كتبت عن هذه التدوينة بالذات ايش السبب الي خلاه تقلب اخصائية نفسيه ؟ حاطة نفسها دكتورة علم نفس
جوابي و بكل بساطة هوه: لا و اقولك المثل يقول _اسئل مجرب
ايوا انا عشت في فترة فراغ و دخلت في حالة إكتئاب صح ما كان شديد لكن اثر فيا بشكل ملحوظ لدرجة صحباتي الي يعرفوني مررة يقولوا لي الاء اتغيرتي سرتي بشوشه للحياة مو زي اول خخخخخخخ
بداية بدخولي لقسم ما ابغاه , ثم بعدت عن اهلي بسبب دراستي,ثم وفاة بابا الله يرحمو و بعدها اتدهورت حالتي الصحية و النفسية سار معايا انيميا حادة و إكتئاب سرت شخص تائه كاني نقطة في محيط ما اعرف ايش اسوي و لا كيف راح اسوي و الامواج تتخبطني يمين و يسار الين ربي انار دربي و انشق طريقي و حصلت نفسي في عالم التصميم و الفوتوشوب و يلية التدوين , كنت اعرف اصمم لكن اخدت الموضوع بجدية اكثر لمن حسيت بالفراغ و بعدها فتحت مدونتي و من هنا بدأت اشتغل على نفسي صح ما كان كل شي واضح بالسبة ليا لكن مع الصبر و المثابرة عرفت ايش ابغا و قررت افتح مدونة ثانية الا و هي مدونتي هذه هنا حسيت بالأنتماء اكثر و سار عندي فرص اكبر اشارك فيها الناس موهبتي خبراتي و تجاربي و الخ
كلو هذا سار و اخذ مني 7 سنين و ما زلت في حالة نمو و تطور فكري لا جسدي اهدافي من قبل 7 سنين ما كانت واضحة لكن حاليا عرفت ايش ابغى و ايش الاحلام الي ابغا احققها عارفه ايش راح اكون لمن يسير عمري 30 عندي هدف و عندي خطة و لسى جالسة باطور فيها و كل يوم اكتشف شي و ارجع اعدل فمخططاتي و احلامي , و الحمدلله الفراغ اصبح جزء من الماضي مع العلم كنت فارغه فكريا اكثر من جسديا
ها قررتي تبدأي حياة جديدة بعيد عن الفراغ , لا تقولي بكرى راح ابداء , ابغاكي ذحين تبدأي تطبقي و اتمنى لك كل التوفيق
حابة تقرأي اكثر عن مواضيع مشابه لهذا الموضوع انصحك بمدونات ملهمه الا و هيا:
مدونة قورجسكل الشكر و العرفان ليهم و لأهلي و صحباتي و اكيد فوقهم كلهم ربنا و شكرا لكم لأنكم قرأتم هذه التدوينة

Advertisements

Author: alaasblog

Alaasaeed ♑️like Octopus addicted to bags & blogging-graphic designer,Readier,new photographer& founder @alaasparks Jeddah 📩Alaasblog@hotmail.com

4 thoughts on “الفراغ”

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s