08 اسباب ترغمك لفتح مدونة (للأنستابلوقرز)

@my_215

بسم الله الرحمن الرحيم

و بعد تحية الاسلام

 

تدوينتي اليوم للجميلات الانستابلوقرز او الي حابة تكون انستابلوقرز , و الي ما يعرف مين الانستابلوقر بإختصار مدونات قرروا يدونوا عن الاشياء الي يهتموا فيها في برنامج الانستقرام بدل استخدام مدونة

طيب بما اني اتعرفت على انستابلوقرز كثير و الصراحة مجهودهم جدا رائع و جميل, في هالتدوينه حابه اشجعهم و اقنعهم على انهم يفتحوا مدونات فعلية و استخدامها بدل الانستقرام , فالاخير لك حرية الاختيار انا ما أجبرك على شيء لكن حابه  اتكلم عن هالشي بذمة و ضمير ليش ؟ ( لأني امشي بمداء أحب لأخيك ما تحب لنفسك ) 

طيب خلوني اتكلم معاكم لكن قبل جيبوا لكم كوب شاي و لا قهوه لأنو الهرجه حتكون طويله و حبيه في نفس الوقت

انتي انستابلوقر انا بلوقر كلنا زي بعض هدفنا واحد , عندنا معلومات و نبغى نفيد الناس بيها لكن اختلفنا في شي واحد انا قررت اطرح مواضيعي في مدونة و انتي قررتي تطرحيها في برنامج الانستقرام , ان كان نيتك انك –تفتحي حساب كتجربة مبدائيه عشان تقرري   مستقبلا انك تفتحي مدونة فالصراحة اشجعك و اقولك استمري , لكن لو كنتي تبغي تستمري في طرح مواضيعك في نفس المكان , هنا راح اقولك  يا صحبتي فكري في الموضوع شوي و اشوف انه حان الوقت انو تقرري تفتحي مدونة فعليه خصوصا لمن تكوني كونتي متابعين و شفتي في تفاعل في صفحتك ,بالعربي كذا هذه هيا فرصتك الذهبية استغليها , طيب حتقولي لي ليش يا الاء تبغينا نفتح مدونة انا مو مقتنعه و اشوف الانسقرام سهل و سريع في طرح كلامي بدل البلوجر اقنعيني !  , اوكي طيب و لا يهمك طلعت لك 8 اسباب واقعيه تخليك بعد ما تقرأينها 100% حتفتحي مدونة لك  الا و هيا كالتالي  :

1-برنامج الانستقرام مهما كان سهل و سريع من ناحيه تلاقي تفاعل في حسابك و مشاركات لكن صمم خصيصا انو المستخدم ينزل صور و كلام قليل , اوضحها اكثر , اي مستخدم في الكون راح يدخل الانستقرام عشان ينزل صور و كلام قليل , ما راح اكذب عليكم سواء انا او اي احد غيري ادخل الانستقرام مجرد اشوف صور و احط لايكات لكن لمن اشوف كلام كثير ما اقدر اقرائه طيب هل يا ترى ليش ؟ هل عشان المحتوى ما يناسبني؟ بالعكس لا , لكن خط البرنامج جدا صغير و محدود التنسيقات على عكس المدونة لك كل كامل الحريات و الصلاحيات في تغيير حجم,شكل و لون الخط

2-عدم وجود تقسيمات : لو انتي بتتكلمي عن اشياء تخص الجمال , الرياضة و الموضه و انا كا قارئ مهتمه بس في مجال واحد ما راح اقدر القى المواضيع الي ابغاها فصفحة وحدة , ( بس يا الاء في شي اسمو انا اسوي هاش تاق يخصني و انزل مواضيع الجمال في هاش تاق الجمال و بكذا تسهل عليك ) صح راح تسهل لكن الهاش تاق ما يحق لك كامل الخصوصيه انك تستخدمية لوحدك انتي بس

فلنفرض إنو عندك 200 الف متابع و تنزلي مواضيعك في الهاش تاق كالعادة لابد يجونك اصحاب الاعلانات و المتاجر يستخدموا الهاش تاق الخاص بك عشان يوصلوا لأكبر عدد ممكن من الناس , راح يستغل الاخرين الهاش تاق حقك لمصالحهم الشخصيه , طيب حتقولي في شي اسموا اسوي لهم سبام او بلوك للأسف ما يسوي شي و راح يتلغوا من عندك انتي بس الانستقرام ما فيه خاصية تبعدي هذا الشخص من صفحتك و متابعينك للابد لو انتي عامل له بلوك فراح يكون بلوك لك انتي بس و احنا لا , فلمن اجي ادخل الهاش تاق المخصص الي انتي عملتيه راح الاقي اشياء اخرى ما لها علاقة فيك ابدا و بكذا هذا حيقلل من نسبة متابعينك و حماسهم لانهم حيطفشوا من عدم وجود تقسييم خالي من الشوائب , اما في المدونة لك كامل الحرية تحطي تقسيمات , تصنيفات, وسوم وبكذا يسهل على المتابع يشوف مواضيعك للشي الي يهمه في مكان واحد مرتب و بعيد عن الاعلانات و الخ

3-محركات البحث ليست صديقة لك : البعض غرضهم من فكرة التدوين انهم يبغوا يفيدوا الغير ما اختلفنا في هذا الشي , لكن للأسف الشديد مهما كان عدد متابعينك كثير و انتي جدا نشيطه , راح يكون مقتصر في دائرة وحدة و هوه الانستقرام بمعنى اخر اتكلمتي عن جهاز الكليراسونيك في الانستقرام و وحدة ثانية كتبت عن هذا الجهاز لكن في مدونتها , لمن اي شخص يبحث في قوقل جهاز كليراسونيك راح يطلع في نتائج البحث موضوع البنت الي كتبت في المدونة و انتي حتكوني في صفحات اخيييره من قوقل او بمعنى اخر لا تكادي ان ترى , طيب ليش مو معقول انا اصور و اتعب و اكتب و ابحث و احط في الانستقرام و ما اخرج في نتائج محركات البحث و الصفحات الأوليه , بإختصار مثل ما قلت قبل الانستقرام برنامج مستقل و فكرتهم الاساسية تنزيل صور ثانيه الانستقرام ما يدعم خاصية كتابة موضوع  الي تساعد المدونات على الانتشار بسرعة و الفضل يعود لمحركات قوقل , انتي تكتبي موضوع لكن الانستقرام يقراءها كا كلام سايب على بعض و مجرد هاش تاق اي شخص يكتب فيه , على عكس المدونة لمن تكتبي موضوع , محتوى ,تصنيفات , وسوم راح ينتشر موضوعك في كل محركات البحث و لمن اي شخص يكتب اي كلمة في قوقل لشيء معين انتي كتبتي عنه راح تخرجي في محركات البحث كسرعة البرق

4- التحكم بالتعليقات 100% : في المدونة انتي مديرة موقعك اي تعليق يجيك لك كامل الحرية انك توافقي عليه انه ينشر او لا تردي عليه او تحذفيه على عكس الانستقرام , حتى و ان سويتي بلوك لهذا الشخص حذفتي ردة ما راح تمنعيه من انه يدخل من حساب ثاني و يعلق في صفحتك ( حككككر علييه )

5- المدونة اكثر أمانا : هذا ما يعني انه ما راح يتم اختراق الموقع لكن تقدري تحتفظي بنسخه من مواضيع مدونتك و تحفظيها في مكان خاص بضغطة وحدة على عكس الانستقرام ما فيه هذه الخاصيه

6- عدم المقدرة على نسخ المواضيع : الانستقرام فيه برامج تخلي الواحد يقدر ينسخ كلامك و ينسبه لنفسه بكل سهوله , في المدونات تقدري تتحكمي بهذه الخاصية إنك تحطي كود يمنع النسخ بكل شكل من الاشكال

7-مظهر مميز : الشكل المميز هوه الي يجذب الناس لك , اوكي تصويرك حلو و مواضيعك حلوة في الانستقرام لكن في بنات زيك كثير تصويرهم حلو و كلامهم حلو لكن شكل بروفايلكم واحد , للأسف الانستقرام ما فيه التحكم بمظهر البروفايل على عكس المدونة تقدري تصممي فيها و تحطي اي شي يعجبك زي ما تبغي عالمك الخاص و انتي حرة فيه

8-الانستقرام برنامج زمني : راح يجي يوم من الايام راح يقل استخدام برنامج الانستقرام و حيطلع برنامج جديد يكسر الدنيا و الكل راح يتجه له , طيب مواضيعي , صوري خلاص احذف كل شي ,على عكس المدونة مواضيعك حتكون مجودة للأبد و ما راح تتأثر

هممممم اعتقد هذا اسباب كافيه و كفيلة بإنك تفكري بجدية تتخذي الخطوة الثانيه و هوه إنك تفتحي مدونة و تستمعي و تفيدي شريحة اكبر من الناس و تسعي لتحقيق احلامك , لسى خايفة من فكرة فتح المدونة او مش عارفه كيف تبداي كتبت موضوعين من زمان عن كيف تصبح مدون ناجح , الجزء الاول | الجزء الثاني

كم وعد مني و متأكدة انكم راح تستمعون و انتم تخوضون هذه التجربة الرائعة اتمنى لكم التوفيق و النجاح في حياتكم و لو عندكم اي سوأل استفسار او حابين احد يساعدكم انا تحت خدمتكم في اي وقت اضغطوا على كلمة contact و راسلوني على الايميل ,و راح ارد عليكم إن شاءالله

أحبكم

 

Advertisements

Author: alaasblog

Alaasaeed ♑️like Octopus addicted to bags & blogging-graphic designer,Readier,new photographer& founder @alaasparks Jeddah 📩Alaasblog@hotmail.com

1 thought on “08 اسباب ترغمك لفتح مدونة (للأنستابلوقرز)”

  1. صادقه مو هذا الهدف من الاستقرام
    وانا عن نفسي اقدر مجهود الانستابلوقرز لكن ما أستفيد منه بالشكل المطلوب ،،،

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s