أتبع أحلامك

/home/wpcom/public_html/wp-content/blogs.dir/267/76778803/files/2014/12/img_6654.jpg

نصيحتي لطلاب المرحلة الجامعيه و المقبلين عليها و كمان للي اتخرَّجوا
.
اتبع أحلامك
.
اذا انت ما تشتغل عالشي الي تحبه فأنت جالس تضيع وقتك
.

كان حلمي اكون طبيبة اطفال ، اتخرجت و جبت نسبة عاليه في الثانوي و القدرات و التحصيلي ، لكن للاسف اهلي رفضوا ادرس برى بحكم مين يرافقني و كانو اكثر شي خايفين عليا ما هم متعودين على انه نبعد عنهم او نفارقهم ، فدخلت في الجامعة و الصدمة لمن رفضوني و السبب ايش اكتفاء عدد ، جلسوا يقولوا لنا جيبوا معدل اول سنة و راح تحولوا، في اول سنة ليا من الترم الاول اتوفى والدي ( الله يرحمة) انتكست حالتي الصحية و النفسيه و مما أدى اني ما قدرت اجيب المعدل المطلوب
.
دخلت قسم ما ابغاه و قلت لاهلي خلاص طالما الموضوع كذا ابغا ادرس مجال ثاني و انا اشوف نفسي فيه من بعد الطب و الجراحة طبعا اهلي رفضوا و كلهم كانو يقولوا لي هذا القسم ما له مستقبل و لا شي و اجبرت اني اكمل لكن للاسف ما قدرت أتحمل لا القسم و كنت في حالة حزن شديدة على وفاة الوالد ما قدرت اتجاوزها بسرعة و حالتي الصحية كانت من سيء لأسواء و فوق هذا كله كنت بعيدة عن اهلي في السكن و ما اقدر اشوفهم غير من اجازة لإجازة .
في سنة ثاني الي هوه اول سنة تخصص لي رسبت في الترم الاول و حملت مادتين و الترم الثاني حملت ثلاث مواد وقتها و لأول مرة في حياتي أرسب دايم من سنة اولى الى الثانوي و انا من الاوئل ، انهارت اعصابي نفسيتي سرت بس ابكي و افتكر ماما من القهر كانت ايام تلومني و ايام تهون عليا كان الموضوع صعب عليها مثل ما هوه صعب علي ، اخيرا قررت و قلتلهم باسحب ملفي انا ما ابغا هذا القسم و لا الجامعه قالت لي ماما ادخلي الدور الثاني و اذا ما نجحتي راح نطلعك من الجامعة و ندخلك في القسم الي تبغيه قلت طيب ، رحت على الجامعه اول امتحان ليا جلست في القاعه جات المشرفه و سارت تقول اسامي البنات الي عليهم اختبار خلصت اللسته و انا استنى تقول اسمي لكن للاسف طلعت مو معاهم اتصلت على مدير القسم و قال اني انا لازم أعيد سنة كامله و ادرس المواد ال٥ الي رسبت فيهم ، اقسم بالله ما كنت اشوف غير غمام اسود دنيا مظلمه كل شي مقفل في وجهي رجعت السيارة و قلت لاهلي و انا خلاص ميتة بكى انهرت اكثر من قبل قالت لي ماما خلاص دحين اتصل لك على الكلية كلمتهم و جلست تسئل قالوا لها باب القبول مقفول ، تعبت اكثر من قبل سارت ماما تقولي خلاص كملي و ايش تسوي ما تجلسين سنه في البيت كذا ، المهم رجعت السكن و كملت على قسمي عديت المواد ، سنة ٢٠١٠ حالتي الصحية انتكست اكثر من قبل رحت المستشفى و طلع معايا أنيميا حادة نسبة الهيموجلوبين كانت قريب ال٦ + قولون عصبي + بطانة جدار الرحم كان عندي سميك ، سرت اخذ الأدوية من هنا و احاول اتجاوز حزني على وفاة الوالد من هنا و احاول احب القسم من جهه اخرى ، نجحت في الامرين الاولى لكن القسم ابدا ما أتقبلت كل يوم كان حرب بالنسبه لي مهما كنت اذاكر احل واجباتي أداوم برضوا عقلي ما كان متقبِّل ما كنت اشوف نفسي في هذا القسم و لا حتى اتخيل هذا الشي ، سنة وراى سنة الين وصلت اخر سنة افتكر ما رحت حفلة تخرجي و لا كنت ابغا اصلا احتفل ، و في اخر امتحان ليا لآخر سنة جاني خبر من اخد الأساتذة اني رسبت في مادة ، لا عاد اخر سنة الكل متخرج ايش ذا الكلام و الله اني حقدت و كرهت كل شي قدامي رحت الدور الثاني و نجحت ، اخذت سنة الامتياز في مستشفى فيصل التخصصي على امل اني ممكن اعجب بطبيعة عملي و ممكن أتقبلها لكن للاسف ما عجبني الموضوع بتاتا البته ، خلصت و اخذت وثيقتي و اتخرجت اخيرا ، اتخلصت من كل شي لكن للاسف هذا الي كنت اعتقده جلست ماما تحاول توظفني غصبا عني لدرجة اخذت وثيقتي و خبتها عندها لانها عارفه اني ما راح أوافق ، سار الكل يخاصم فيا و يقولي انتي هبله انتي غبية انتي متخلفة في احد ما يتوظف بهذه الشهادة قلتلهم طيب سرت ادور على وظايف و ما كنت احصل في هذا الوقت آمنت بقانون الجذب لإني ما ابغا اشتغل الوظيفة ما تبغى تجي قبل كم شهر حصلت وظيفة و ياليتها حتى تناسب الشهادة ، المطالبات الوظيفيه للمنصب ( كاتب) شهادتي أعلا منها و الصراحه رفضت الفكرة تماما يعني كفايه ادرس ٦ سنين و بشقى و تعب اتخرج و فالأخير اجلس ارتب ملفات و اكتب أوراق ( لو كنت حابه القسم كان أتقبلت من غير اي نقاش ) ،رفضت موضوع الوظيفة و بشده انا اعرف ما في شي يبداء من التوب لازم نبداء من الصفر الى فوق ،لكن طموحي و قدراتي أعلا في حلمي ما أتقبلت اني أتخلى عن حلمي و لا راح اقدر و لا راح ارتاح الا اذا حققته ، اهم ما عليا ادخل هذا العالم عادي أتقبل ابدا من الصفر عادي أتقبل يكون راتبي قليل لكن على الأقل اشتغل في شي يجيب لي السعادة يسمح لي اني ابدع و الهم أشخاص اخرين فيه
.
في الأخير نصيحتي لا تضيع من وقتك على شي ما تبغاه ما يناسب ميولك طموحاتك و أهدافك ، أسعى وراى حلمك لا تسمع لي كلام غيرك محد يعرف و يفهم طريقك و يشوفه واضح قدك انت ، أسعى ثم أسعى ثم أسعى لا تجلس مكتف الايدي او انك تكذب على نفسك انك راح تتقبل الواقع لانه راح يجي يوم و بتنفجر على نفسك و كل من حوليك و حتتعب اكثر
.
حبيت اشاركم قصتي عشان ما ابغا هذا الشي يتكرر لاي احد فيكم و ممكن تلهم شخص فيكم انه حان الوقت انه يركز على حلمة و يحققهم
الله يوفقكم و لا تنسوني من دعواتكم الطيبه و انه ربي ييسر لي أموري كلها لي و للجميع لن شاءالله

Advertisements

Author: alaasblog

Alaasaeed ♑️like Octopus addicted to bags & blogging-graphic designer,Readier,new photographer& founder @alaasparks Jeddah 📩Alaasblog@hotmail.com

2 thoughts on “أتبع أحلامك”

  1. ذكرتيني بنفسي ، من يوم اتخرجت من الثنوي جلست سنة بالبيت عشان ارتاح لان وقتها نفسيتي كانت جداا تعبانة .. وجلستي بالبيت ماندمت عليها ابداااا اتعلمت فيها حاجات جديدة ، عرفت فيها جوانب من ف
    نفسي ماكنت اعرفها ، المهم بعد السنة قدمت على دبلوم في الحاسب وكنت متردده وخايفة وشجعتني امي عليه والحمدلله خلصت الدبلوم بعد سنتين وخرجت بمعدل مررررره كويس وعشان معدلي جاتني فرصة اني ادخل بكالوريس وهنا اترددت كثير لان فكرة اني اكمل ماكانت براسي ابداا ، اتحمست اني اكمل بعد ماجاني اتصال من احد مشرفين الجامعة ونصحني جدا اني اكمل وتوكلت ودخلت اكمل .. وعلى اساس يعادلولي المواد اللي اخذتها ويعدولي السنة التحضيرية بس دخلت على صدمة السنة التحضيرية وبدون معادلة مواد وبالغصيبة عديتهاا ونزل معدلي تقريبا ٢٠ درجة ودخلت التخصص ومازلت بمعمعة معادلة المواد بالنهاية ماعدلولي غير ٤ مواد من اكثر من ١٦ مادة والحين خلصت اول سنة تخصص ومعدلي نزل بشكل كبيرررر عن زماان …. وباقيلي ٣ سنوات ،، ومازلت بحيرة بين اني اكمل وبين اني اخرج من الجامعة ، صرت ما اشوف اني استفيد شي من دراستي وعندي قابلية اني اتعلم الشي اللي احبو ومنو اشتغل بشي انا احبوو ،، الله يكتب اللي فيلو الخير

    Like

    1. شكرا لك لمشاركتك تجربتك و صدقيني مافي شي يدوم على حاله و الله يسهلك كل امورك ي رب و أتبعي احلامك ايش ما كانت

      Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s