ايش البس في المناسبات السعيدة |اخر صيحات الموضة لملابس السهرات و المناسبات

بسم الله الرحمن الرحيم

السلام عليكم و رحمة الله و بركاته

اليوم بإذن الله موضوعنا حيكون مساعد لكل بنت عندها مناسبة و طبعا الي يتابعني في الانستقرام عارفين انو عندي مناسبة قريب و كنت محتاسة و الحمدلله نسبيا ارتحت بعد ما حصلت فستاني فقررت اساعدكم و اعجل على كتابة الموضوع للناس الي مداهمهم الوقت

تنبية هذا الموضوع مو مناسب للعروس بل للناس المتورطين معاها هي و العريس ( الله يسامحكم و يتمم لكم على خير )

طيب قبل لا تختاري اللبس الي راح تلبسينه لازم تحطي في بالك عدة نقاط مهمه و على قول المثل ( لكل مقام مقال ) :

1-نوع المناسبة :

احنا العرب و بالاخص الخليجيين كل شي له مناسبة و كل مناسبه لها لبسها , مناسبة الزواجات , الملكة , الشبكة , الشوفه ( النظرة الشرعيه) إن كنتي ما تعرفين الناس بتزورونهم , سابع , حفلة تخرج نجاح او يوم ميلاد و تطول اللسته

2-مكان المناسبة :

احيانا في  ناس يسوون المناسبات السابق ذكرها في قاعه ¸قصر فراح , بيت , إستراحة  فلازم تعرفين فين مكان مناسبتك عشان تختاري اللبس الصح فمثلا صعبة تلبسين فستان بذيل طويل و المناسبة في بيت و الله اعلم هل البيت  كبير صغير الخ

3-صلة القرابة :

صلة القرابة مهمه جدا في اختيارك للبس فإذا كنتي من اهل العروسة او العريس يكون مختلف تماما ان كنتي من المعازيم, صديقة مقربة او  تقربين لهم من بعيد ( لازم يكون مكلف شوي إن كنتي تقربين لهم لزم  اللبس يكون مكلف وسط ان كنتي قريبة لهم من بعيد و صديقة و يكون بسيط ان كنتي من المعازيم ) لكن في الاخير كل واحد ينام على الجنب الي يريحه و يناسبه

4-شكل جسمك , لون بشرتك , طول شعرك و عمرك :

مهم جدا و اهم من المهم مهما كان نوع المناسب و صلة قرابتك إنك تعرفين بالزبط ايش الي يناسبك و يلبق على لونك من لبس و الخ فمثلا عندكم اللون الاحمر له عدة درجات و كل درجة تناسب لون بشره معينه مثله مثل اللون الاصفر الاخضر و الخ , طول الشعر لازم تحطينه فبالك عشان كل لبس و له تسريحة تلبق له فمثلا مو معقول يكون لبسك بفستان مشغول و مكلف من وراى الظهر و تقومين تفلتين شعرك ابدا ما يصير كذا العمر له دور مهم في اخيار اللبس اختاري الشي الي يناسب عمرك لا يكبرك عن عمرك و يضلمك و لا يصغرك ( يخليك كأنك طفلة عمرها 4 سنين )

ذحين ندخل في صلب الموضوع اول شي راح نتكلم عن الالوان الدارجة من خريف شتاء 2014-2015 الى صيف ربيع 2015 و هذي هيا الالوان

16 23 33 43

الوان صيف ربيع 2015  مع العلم لون هالسنه هوه المرسالا جدا جميل و فخم حبيته الصراحة

folie11

ثانيا اشياء الموضة الدارجة في الرن وايز و السوق ( تنبيه اخترت اخر صيحات الموضه بس للفساتين فحتلاقوا صيحات اخرى بس ابدا ما تناسب السهرات و المناسبات السعيدة )

1-موضة الخمسينات

صدقوا او لا لكن موضة فساتين الخمسينات بدأت تطل علينا من جديد و بشكل مميز و يناسب عصرنا لكن محافظ على الستايل القديم , الفساتين الي شفتها فالسوق اغلبها كان قصير تحت الركبة مثل الستايل القديم ماسك من الوسط و واسع من تحت و فيه كسرات بسيطة و ناعمه اما بالنسبة للحلق فكانت بعضها برقبه طويلة او قصة دائرية او واسع و مبين الاكتاف و بعضها قصتها من عند اليد اما كت او نصف او كامل ,  اغلب الفساتين معاها احزمة على شكل فيونكات كبيره و تكون من قدام و لك حرية الاختيار انك تلبسيها او لا

2alaasblog 1alaasblog

2-الباروك ستايل

هذا الستايل ماخوذ من وحي الفن الفرنسي سواء موسيقيا او فنيا و الخ , يشتهر بتصاميم مليئه بالنقش و القماش المستعمل فيه اما حرير , قطيفه , شيفون , مخرم (دانيتل),او كشميري و اكثر دار إنشهر بهذا الستايل هوه دولتشي اند قبانا

في السوق حصلت فساتين كثير قماشها قطيفه و مدموج معاه قماش ثاني اما تفتة السكر او الشيفون او الحرير و الستايل تبع الفستان تبع الخمسينات

6alaasblog 5alaasblog 4alaasblog 3alaasblog

3-التنانير الميدي

التنورة الميدي تقدري تلعبي فيها زي ما تبغي و تسوي اكثر من ستايل تقدري تفخميها ب بلوزه , اكسسوار زي الستيتمنت نكلس (عقد) و دايم اختاري التنورة تكون منفوشه  مو الماسك على الجسم (سكيني) عشان يكون مناسب للسهرات

7alaasblog4-الجمبسوت (اللبس الكامل ) :

تقدري تلبسي الجمبسوت في المناسبات لكن بشرط تكون القصة و القماش يبين فخامته مثلا مطعم بقماش الدانتيل مع الحرير لكن ما راح تتكلفي في الاكسسوار , و اذا ما حصلتي الا واحد بسيط البسي عليه العقد الستيتمنت يعطيه فخامه اكثر

8alaasblog 9alaasblog 10alaasblog

مشكلة الجمبسوت عندنا في السوق يعتبر شبه معدوم ما تحصليه الا في اماكن معينه زي زارا و اخواتها لكن المحلات الي تبيع فساتين نادرا ما تحصلين عندهم و اذا حصلتيه يكون جدا بسيط و ناعم بشكل مو طبيعي و ابد مو مناسب للسهرات

و بكذا وصلنا لأخر البوست إن شاءاالله يكون افادكم و اعطاكم فكره ايش تلبسو لمناسبتكم الجايه لا تنسوا تعملوا مشاركة لصديقاتكم و اهلكم لرابط التدوينه و اتمنى لكم يوم جميل

أحبكم

3>

Advertisements

Author: alaasblog

Alaasaeed ♑️like Octopus addicted to bags & blogging-graphic designer,Readier,new photographer& founder @alaasparks Jeddah 📩Alaasblog@hotmail.com

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s