هذا ما تعلمته من 2015

بسم الله الرحمن الرحيم

السلام عليكم و رحمة الله و بركاته

طبعا عشان تكونوا معايا عالصورة و تكون واضحه لكم اتمنى انكم تقرأون هذه التدوينة الي اعتبرها تكمله للكلام الي راح اقوله ( إضغط هنا )  

تدوينة اليوم بعيده كل البعد عن المثاليه و البهرجه الزايده و الكلام المتكلف الي ما يقدم و لا يأخر و لا يفيد اي احد , ايوا الكل راح يتكلم عن إنجازاته عن الي عملها و الاهداف الي حققها هالسنه بدون ذكر اي نوع من انواع التفاصيل which is for me kind of wasting the readers time 

فعشان كذا باجلس معاكم و احكيكم ايش سار لي في 2015 و ايش استفدت منها , الاشياء الي سارت لي الي عجبتني و الي قهرتني و الي بتاع كلو

بدايا خلوني اتكلم لكم عن مرضي الي مو كلكم تعرفون عنه بس اتوقع لو انكم كنتم تتابعوني من بدايه السنه و بالأخص فالسناب شات تعرفون انو كان معايا إضطراب في هرمونات مما ادى ذلك ان عادتي الشهريه تخبص معايا و تعتبني نفسيا , فلكم ان تتخيلو تجلسون في حالة نزف مستمر دون إنقطاع شي يجيب الهم و القرف وصلت لمرحلة اني كرهت نفسي فيها كان ودي احرق كل الي في البيت نفسيتي تعبت ما سرت اطيق احد و الي يقهرني كمية النصائح و الاشياء الي لا علم و حصر لها دخلوني فيها و كنت حكون فأرة تجارب حرفيا للعالم بأسره ( طبعا بأقتطع جزء من القصه و حابه احتفظ فيها لنفسي و الباقي اسرده لكم ) المهم بعد ما كشفت على نفسي و حللت طلع عندي لخبطه في هرمونات الأستروجين و الانتروجين و الحليب و اخذت لي كورس مدته 6 اشهر عشان اتعالج بعدين لمن الامور رجعت سليمه انتكست حالتي مره ثانيه و رحت عند دكتورتي الين كل الامور اتزبطت من حوالي تقريبا 4 اشهر تقريبا و اتمنى اتمنى يا رب يفضل الحال على ما هوه عليه . الحمدلله كانت ايام تشبه الظلام لكن بفضل من الله رجعت الامور تمام و هذا هوه المهم , ما اخفيكم انو لسى عندي مشاكل اخرى لكن حابه اكتب لكم عن موضوع مرضي التفصيل في تدوين اخرى لأني متأكده كثير منكم مروا في هذا الموضوع من قبل .

لكن خلاصة الموضوع و الاشياء الي استفدت منها وقت المرض هيا كالتالي :

  • 1 لو تموتي لو ايش ما يكون لا تسمعي لكلام فلانه و فلتانه مين ما كانت ان شاءالله لو انها عانت من نفس الشي الي سار لك و ذلك لأسباب مختلفه اولا هذا رحمك هذا جوهرة انوثتك و الشي الي بتعيشين معاه لحظات مهمه في حياتك من حمل ولادة الخ لو سار له قد النمله لا تهملين نفسك و تقولين لا انا ما فيا شي, الله يخليك لا تقولين لا فلانه حصلها زيي و بأخذ مثل دواها ,الله يسعدك لا تقولين قرأت في منتدى و لا موقع اشربوا و ابلعو الحبوب الفلانيه و العشبه العلانيه و تدمرين نفسك بنفسك
  • 2 مليون بالمية امك من خوفها عليك و انها ما تبي تشوفك في انتكاسه و مرض بتقولك لا ما فيك شي و انا زيك و الوضع يرجع طبيعي ( و هالشي سار لي مع امي ) مع كل احترام , حب و تقدير لها و الله لا يحرمنا منهم بس حاولي تقنعينها انه لازم تروحين للمستشفى خصوصا لمن الوضع يصبح خطر عليك , ايش ما كان نوع الالم و المرض الي تحسينه شي بعيد عن المألوف . يعني مو معقول يكون معك زكام و امك تقولك اشربي زنجبيل شاي الخ تقولين لا لازم اروح الدكتور هنا انتي حتكوني عبيطه الصراحه , بس اكيد وصلكم مقصدي اي مرض او الم غير الأشياء الي انا كبشر معتادين تحصلنا روحي لها عند دكتور مختص
  • نفسك ثم نفسك ثم نفسك ان اهملتيها محد بيفكر فيك حتى اهلك اي نعم حتى اهلك ما راح يهتمون لأمرك كثير مو معناته انهم ما يحبونك او ما يبغون لك الخير , هما مع هول الصدمه حدهم يوم يومين بالكثير شهر اسبوع الخ يعتادون عالوضع وو خلاص بيركزون في امور حياتهم محد فاضي لك , فلا تجلسين تزعلين و تقولين ليش محد يهتم ليش محد يقدر لا تستنين شي من احد ,نفسك في مرحلة مرضك تبغاك خليك جليسه لها اتعرفي على نفسك اكثر افهمي نفسك بشكل اعمق راجعي الشي الي خلى الامر يسير لك كذا و ايش السبب و حاولي تتجنبينه و تعيدين التفكير في طريقة نمط حياتك و ما الى ذلك
  • اخيرا تقبلي الامر و تعايشي معاه و عالجيه بدل لا تجلسين تلومين نفسك و تبكين كثري حمد و إستغفار , اشغلي نفسك بالأمور الي تحبينها لا تجلسين لوحدك و تخلين مكان للشيطان يلعب براسك و توسوسين , اعرفي انه هوه مرض له حد و وقت معين و بإذن الله يختفي , تفائلي و خليك إيجابيه , انا ادري ان البعض و انا كنت منهم وصلت مرحلة إكتئاب من الي سار لي و الصراحه يحق للواحد عزيمته تتحبط و يتعب نفسيا و لازم و غصبا عن الجميع بنمر في مرحلة حزن وقت ما نمرض ( فلا تدعين الايجابيه و انتي في داخلك حزن ) عبري عن حزنك طلعي الي بقلبك الين خلاص على قولهم تفشين خلقك , ان الامر زاد عن حده و لقيتي نفسك مو قادره تخرجين من دائرة الحزن اطلبي المساعده من الناس روحي شوفي لك طبيب نفسي الي يريحك بس لا تجلسين على هذا الحال فتره طويله لأنك راح تتعبين بشكل اكبر , اي نعم انا وصلت مرحلة إكتئاب و عزله عن البشريه لكن , ( انا + نفسي + اهلي + اصدقائي و فوقهم ربنا ) قدرت اخرج من هالدوامه و رجعت طبيعيه الحمدلله , انا ما ابغا اطول في هذه الفقره لأن برضوا راح اتكلم لكم عنها في تدوينه منفصله بإذن الله لأنه يحتاج توضيح اكثر و تفسير لبعض النقاط

فقدان الاصدقاء

 هالسنه و الله و حقيقي فهمت يعني ايش صديق , صديق مو يصادقك عشان يتمصلح معاك , يدور عليك وقت ما يبي يهرج عشان محد عنده و يسحب عليك كل السنين , او يصاحبك عشانك يتفاخر فيك .

انا كل حياتي الي عشتها من ربي خلقني ما قد صادقت ناس او نكون واضحين انا الي ما افتح قلبي و اشارك حياتي لأحد  و كمان اكون اكثر وضوحا انا انسانه غامضه على قول اختي ههههههههههههه لأني قليلة الكلام عن النفس فمحد يدري ايش يدور ببالي او يحس فيا الناس تعرفني او بالأصح انا اعرفهم اكثر مما يعرفوني , بدون مبالغه ايام المدرسة و الجامعه من ادخلها الين اخرج كل البنات من كل الاعماار و الاقسام يسلمون عليا يضحكون معايا نهرج نخرج كل شي يدور في بالكم لكن بالغالب ما اعطي احد بطاقة ادخله حياتي عقلي و فكري مو من باب عدم الثقه او شوفة نفس لا بل لأني إنسانه احب الناس الي تفهمني بدون ما تحكم عليا عقليتنا تكون منسجمه اكثر مما تكون متباعده في بيننا قواسم مشتركة في كل جوانب الحياة و اهم اهم اهمممممم شي عندي الفكر , اذا تفكيرك يتناسب مع تفكيري مليون فالمية راح اخليك تتعمقين في حياتي لكن برضوا حيكون في حدود بيننا.

المهم  انو هالسنه الله انعم عليا بنعمة الصداقه الجميله الخالصه بالمحبه و الاحترام البعيده كل البعد عن النفاق الحسد الكره و الانانيه و الله لدرجة سرت اخت لهم و هما يبادلوني نفس الشي , ان يوم ما كلمتهم او عشرين الف يوم و ارجع اكلمهم يتكلمون معي طبيعي و لا يشرهون علي بدون ما يحطون في بالهم نيه سيئه عني بل بالعكس سارو خلاص فاهميني عارفين ايش عندي فما يجلسون يتعبون راسهم وين الاء او ايش قاعده تسوي , و سبحان الله مجرد اتكلم معاهم يعرفون انا طيبه او ضايق صدري مع العلم اني ما احب اوضح لهم اني مو طيبه بس خلاص هما يدرون و يجلسون فوق راسي زن الين اقولهم بالي فيا 😦 ي حبي لهم بس , و يسمعون لكلامي الكثير الذي لا نهاية له و يتفاعلون معايا , يهتمون لأدق التفاصيل الي تسير في حياتي يشاركوني في فرحتي و حزني يبادولني الافكار و الارائ في الامور الي تخصني , كل هذا انا و هما نتعامل مع بعض نفس المعامله يعني اسمع لهم و يسمعون لي ما ازعل اذا ما ردو علي الا متاخر او ما يسئلون عني و هكذا . إختصارها صداقة متنافيه عن المثاليه و البهرجه الزائفه خاليه من الافكار السوداويه , ايوا قد نتخاصم ما نتفق على امر معين لكن هذا ما يخلينا نبعد عن بعض و بالفعل هما اصدقاء يفضلوا معايا و يستحقون اني القبهم بي best friends forever الله لا يحرمني منكم و لا يحرمكم مني بس.

I do forgive but i’ll never forget | اسامح بس ما انسى 

هالسنه خليت هالمقوله الي قراتوها جزء من حياتي و طبقتها على كل شخص يسيء ليا حتى و ان كانوا اهلي اي نعم حتى اهلي . العام و قبله كثرت مشاكلي لدرجة بدأت ما اسامح و لا انسى اي احد يغلط عليا . الشي الي غيرني عن هذي العادة نفسيتي انا بدات تتعب بجانب المرض كنت اعاني من مشاكل شخصيه و سرت في اسواء حالاتي , الى ان جا اليوم الي ماني قادره افتكر بالزبط مين صحى الشي الي بداخلي بس متأكده انه دكتور وين داير ( R.I.P ) ألي اتوفى هالسنه و تحديدا كان الفيديو الي شفته في مدونة حنين و الي هي كمان لها نصيب في تغيير هالشيء فييا من بعد الله عزوجل , و رحت ابحث عن الدكتور و بالصدفه سمعت له , انا اعرف انو بعضكم ما يؤمن بقصص الطاقة , تطوير الذات و ما الى ذلك بس انصحكم بشي تبحثون عنه في حياتكم هوه السلام الداخلي فإن وصلتوا له حياتكم حتصبح افضل + لا تلومون الناس حتى و ان غلطو عليكم بل لوموا انفسكم , خلو عندكم جزء من تحمل المسؤوليه , العفو و الصفح عن الاخرين و اخيرا عدم تكرار الخطاء مره اخرى , بالله اسئلوا نفسكم كم مره راح تعيشيون و الين متى راح تفضلين تقولين فلانه غلطت علي و الله ما اسماحها و هذا فعل فيا و الله ما اخليه الين متى تتعبين راسك عقلك قلبك كل شي فيك على امر حصل و انتهى لا انه بيدك ترجعين الزمن لي ورى و لا بيدك اي شي غير انك تتفادينه و تقمعينه للابد , عيشوا حياتكم محد بينفعك غير نفسك ان جاك القولون , القلب , جلطه دماغيه محد بيطالع فوجهك من ذي الفئه الي زعلتك , ركزي في نفسك و اهلك و الناس الي منجد تحبك و الباقي اسحبي عليه و وكلي امرك لربنا , ( إن الله يمهل و لا يهمل ) الي عملوه فيك بيسير لهم فليش تكدرين على نفسك طالما الله بياخذ حقك سواء في الدنيا , الاخره او الاثنين سوا ليش ؟؟ فكروا فالموضوع و اعطوا لنفسكم فرصه قبل لا تقولون اي شي او تقررون اي قرار راح تندمون عليه .

الامور الجميلة تأتي في الاوقات المناسبة 

طيب عشان اني قلتلكم اني باكون صريحه و بعيده عن المثاليه , فبقولكم اني انسانه لا صبر لي يعني عندي نسبة صبر 0.1% اما قوة التحمل فهي 1000% ههههههه , من اكثر الاشياء الي عقدت اهلي و طفشتني هوه مشروعي الي لا هوه طايل ارض و لا طالع سما > صح كذا تنقال ؟؟ لو غلط مشو لي ها ! < و طبعا مافي اكثر من شي يقهرك تتخذين وضعية المزهريه و اعمل نفسك ميت و تفكرين كل ليلك ونهارك متى يسير الشي الي في بالك كان الموضوع بالنسبة لي تحدي , و بعد ما قدرت افتح المشروع و اغير منه بعض الشي  طالعت في نفسي كذا و قلت و الله اني انسانه ماليا صبر جلست اشوف الاحداث الي سارت لي قبل لا افتح المشروع و الله بجد صدق من قال ان كل شي يجي بوقته , درس و فهمته الواحد لا يستعجل الامور , قد يسير للانسان اقدار تخليه يتعثر او يتأخر , المشاريع عموما تحتاج منك صبر , كمية إيجابية عاليه , تخطيط و لازم يكون عندك نماذج خطط و تحطين فرضيات و احتمالات , و ما الى ذلك و اخيرا لا تستسلمون و تقفلون احلامكم اتشجعوا و خليكم قدها و كافحو لأن فالاخير راح تنبسطون لمن تنجزون الشي الي تسوونه و تطالعون وراى حتكونوا فخورين من نفسكم

و الي حابب يعرف ايش هوه مشروعي يدخل هالرابط هناااا

اهلي طلعوا ناس طيبين

ادري بعضكم بيقول خير الاء ايش الكلام الي قاعده تقولينه كأنك ما تعرفين اهلك ؟؟؟؟ و الله لكم عليا انا اتحاشى اجلس معاهم كثير هههههههههه بس الهرجه مو هنا لا الهرجه انو في امور خلتني اقرب من اهلي اكثر و اكثر و اتعرف على شخصياتهم و اتعمق فيها , هاليوم ابدا ما راح انساااااه في حياتي و هوه السبب الي خلاني اقولكم كذا طبعا لو انتم تتابعوني فالسناب فأكيد تفهمون وش الهرجه , قبل كم شهر انقطعت الكهربا و طولت ممكن جلسنا يومين او ثلاث ايام على هالحال ,عاد تخيلوا لا نت لا تلفزيون لا شي الكل انفصل على الجهاز الي في يده و سرنا نشغل شموع و نجلس في مكان واحد في ذاك اليوم سارت لنا امور كثيره و من ضمنها سار في تواصل هرج بيني و بين اخواتي و كاني اول مره اتكلم معاهم و خرجنا برى سرنا نلعب و انا اخذتني الحماسه مع اختي و طلعنا دراجه اخويا الصغير و لعبنا فيها ههههههههههه و من بعدها مين يفك الاء عن الدراجه يا الله قد ايش وحشتني ايام الدراجه و اللعب فالشارع و المشي استرجعت كل ايام طفولتي فذاك اليوم , و ضربت فينا الحماسه مره و اشتطينا لمن رحنا البحر انا و اخواتي كنا نطالب ( اهم شي مطالبه كاني في مجلس شورى هههه)  خالي بأنه يعلمنا السواقه فالبدايه رفض سكتنا و بعدين قال طيب و هاتك الكل سار يسوق الين وصلنا البيت , عاد اختكم الاء اشتطت بزياده من بعد الدراجه و قلت لخالي الصراحه ابغا اسوق الجمس وانيت و يلا يا الاء سوقي و رفضت خالي يمسك اي شي بس يوجهني و انا اسوق هههههههههههه , اخواتي كانوا في الحوض او الصندوق الي هوه المهم و جبت العيد لمن دقيت البريك كانو راح يطيحون من السياره ههههههههههههههههه المهم عدت الامور على خير صحيح انو لو دحين اروح افتح الجمس مخي بيهنق و ناسيه كل شي بس يبيلها ارجع اسوق ثاني, كمان نسيت اقولكم كنت اي طلعة بحر نروح لها تجيني ضيقه في نفسي لدرجة انفسن عليهم الا و الا ابغا ارجع البيت بس من بعد ذاك اليوم غيرت هالخصله فيا و لاحظتها اكثر لمن سافرت على دبي و ما فعلت النت في جوالي فإضطريت اني اقابل اهلي كل الرحله و اتواصل معاهم بل بالعكس  سرت افضل اني اجلس مع اهلي وقت اطول صحيح لسى ما اتغيرت جذريا لكن وجود الشي افضل من عدمه

الخلاصة هالأجهزه و التقنيات خلتنا ننفصل عن بعض سار ما عاد في اي تواصل حتى و ان اتجمعنا على اكل او فلم , مسلسل برضوا مافي اي تواصل فعلي فيما بيننا كأهل , و من هذاك اليوم بدأنا نغير من طريقة حياتنا سرنا كل يوم نمشي الصباح صحيح مو الكل يروح بس بأسم انو نسوي نشاطات عائليه و اشياء مختلفه .

مواقع التواصل الاجتماعي مضيعه للوقت 

كوني صاحبة مدونة و قناة . من جهه و عندي 3 حسابات في مواقع تواصل اجتماعي من جهه اخرى , اكتشفت ان هالشي يضيع من وقتي كثير و على راسهم برنامج السناب شات ( للتوضيح فقط اني ارد عليكم و اتكلم معاكم لا يمد للموضوع بصلة ابدا و بتاتا البته بل هذا يعتبر شي لازم اسويه) , هالموضوع سببه انا ايوا انا كيف ؟ اولا محد ضربني على يدي و يخليني امسك جوالي 24\7 اتابع فلان ايش سوا و هذا وين راح و اضحك مع هذا و امزح مع دا بينما انا عارفه انو عندي امور لازم التزم فيها و من ضمنها مدونتي و قناتي . مشروعي و حياتي كمان . سرت اضيع وقتي على غيري و نسيت نفسي كليا و بداء الموضوع يأثر عليا شخصيا , فسار في مخي زحمة افكار مما ادى ذلك نسيت كيف اطرحها , الابداع و الالهام اختفى مني و السبب واضح جدا مني انا بدل لا اشوف شي مفيد اعمل حاجه مفيده علشان تكون مصدر الهام و محفز ليا و يخلني اركز على اهدافي سار العكس تماما و خلاصة هالشي و رسالته و الشي الي اكتشفته انو لا اخلي قوة السوشيل ميديا و تاثيرها يأثر على حياتي و اهدافي الي انا عايشه عشانها و احدد لنفسي اوقات و ايام اشوف فيها الاشياء و الاشخاص الي اهتم لأمرهم بدون ما يتعارض الامر على اهدافي ( اركز في نفسي ابرك لي مليون مره من اني اضيع وقتي على شي ما راح يقدم و ياخر من حياتي شي اذا شفته او لا )

سنة 2016 سنة تحقيق الاحلام التمييز و العطاء 

صحيح اني ما راح اتكلم عن الاشياء الي حتسير في السنه الجديده بس ابا اقولكم شي , انتم كمان يا متابعيني و قرائي لكم نصيب من اتخاذ بعض من قراراتي سواء فالسنه الي فاتت و السنه الي راح تجي بإذن الله , فحابه اشكركم على كلامكم الجميل و دعمكم لي اشكركم انكم تعطوني جزء من وقتكم عشان تشاركون معايا جد اشكركم , ما يهمني ان كان ما عندي تفاعل كثير في صفحتي زي باقي المدونات او عدد كبير انا يهمني الشخص نفسه الانسانه الي اعطتني جزء من وقتها عشان تكتب لي تعليق او تعمل لي لايك او تشارك اي شي احط في مواقع التواصل حقتي و مدونتي انا اشكرك شكر شخصي على ثقتك فيا و متابعتك ليا شكرا من كل قلبي و اتمنى و انتي تقراين هالكلام ان ربي يكتب لك اضعاف اضعاف سعادتي و يرزقك من فضله و يجعل ايامك مليئه بالأنجاز و الفرح اتمنى ان سنة 2016 تكون فاتحه خير لك يا رب اتمنى انك تكوني بصحه و عافيه و يسير لك كل شي جميل تتمنيه و يبعد عنك كل شر , شكرا لك بحجم الكون و اتساعه ممتنه لك دائما و ابدا

و بكذا خلصت تدوينة اليوم يا رب تكون مصدر الهام لكم و محفزة انكم تسوون شي مميز لهالسنه , شااركوني ايش عملتوا السنه دي و ايش استفدتو منها ؟ حابه اقراء تعليقاتكم و شكرا لكم جميعا

Love ya All

 

Advertisements

Author: alaasblog

Alaasaeed ♑️like Octopus addicted to bags & blogging-graphic designer,Readier,new photographer& founder @alaasparks Jeddah 📩Alaasblog@hotmail.com

6 thoughts on “هذا ما تعلمته من 2015”

  1. مرحبا الاء
    يالله قرأت تدوينتك ودخلت جو وانا أقرأها.. كلامك جدا مؤثر وواقعي مليون بالميه أحب التدوينات الواقعيه باحداثها الحقيقيه البعيده عن التهريج واني انا الواو السعيده المبسوطه والغنيه والخ هذي تتعبني نفسياً للاسف وماتعطيني اي حافز بالعكس احسها من وحي الخيال أما كلامك شيء واقع ويعكس طيبة قلبك وشخصك .. نقاطك جميله ابتدأً من نفسك الى اخر نقطه تاثير السوشيل ميديا وللاسف اني وحده من الناس اللي طاحت في شباك السوشيل واتمنى احد من هالشيء..
    حاليا انا اعيش حالة السلام الداخلي بس احتاج صفاء نفس اكثر..
    اتمنى احدد اهداف ناضجه في السنه الجديده واكثر جديه لي شخصيا و لعيلتي الصغيره

    شكرا لك من القلب تمنيت اكتب اللي بخاطري كله بس حسيت اني بكتب تدوينه داخل تدوينتك ههههه
    عموماً لك من القلب تحيه😘

    Like

    1. ريمو القلب هلا و غلا و الله ، و الله اني مبسوطه انها نالت إعجابك الصراحه كنت خايفه اني اكتب موضوع زي كذا بكل شفافيه و وضوح خصوصا ان الأغلب يعتبرها كالحلطمه لكن توكلت على الله و قلت اكتبها لان الواحد مو كامل و الكمال لوجه الله سبحانه،الله يوفقك ي قلبي و يحقق مرادك مع عيلتك و يكتب لكم السعادة يا رب شكرًا لك و سعيدة بكسبك كصديقه ما انحرم منك و الله 😘❤️

      Like

  2. مساءك سعاده / ألاء

    السلام عليكم
    حبيت تدوينتك جداً و أكيد لاحظتي اعجابي فيها بتويتر 🙂

    نقطة السلام الداخلي هذي حقيقه مو خيال هي السعاده الحقيقه بهالحياة لما نوصل لهذا الشعور مره شيء مريح وهاديء احساس يجعلك ترى الامور حولك بحجمها الطبيعي
    ماتصبر تكبر المسائل و لا تصير الظروف المحيطه بك هي التحكم والمسيطر عليك بالعكس أنت من تتحكم بها .

    والتسامح مع الأخرين شيء رائع وسامي لكن الاسمى يا ألاء يا صديقه التدوين أن نسامح انفسنا ايضاً ، ونعاملها بلطف بالعكس ما نأنبها بل نوجهها و نصادقها ونعيش حيتنا بإبتسامه و رضا حتى عن انفسنا وذواتنا .. ونحمد الله على ما اعطانا من شخصيه و سلوك ومطهر و مخبر .

    الكلام يطول وتدوينتك محفزه تخلي الواحد يسترسل بالكتابه لكن اقف هنا واقول لك ابدعتي
    .
    .
    اتمنى لك من كل قلبي نجاح باهر يارب في مشروعك
    .
    .
    في أمان الله وربي يكتب لك ماتتمنين
    .
    .

    Like

    1. و عليكم السلام و رحمة الله و بركاته جولزا اهلًا و سهلا اول شي شكرًا لك على تفاعلك و شفت التويته حقتك ، اتفق معاك بنقطة السلام الداخلي بالفعل سعادة ما تنوصف و التسامح مع النفس شيء ضروري و لمن تكونين متسامحة مع نفسك يجيك السلام الداخلي ، مررره أشكرك على كلامك الرائع جدا أسعدت بتعليقك الله يوفقك و يكتب لك أضعاف ما دعيتيه لي ي قلبي ❤️

      Like

  3. ربي يسعدك يارب كلامك عن نفسك وصراحتك مع نفسك ومعانا ايضا اعطتني نقاط في حياتي كنت شبه محتاجه اسمعها وافهمها وتوصلني من احد اخر غير عقلي … ربي يسعدك سعادة ابديه ان شاءالله … ومتابعتي لك بالانستا من اول ما فتحتي حسابك وبعدها السناب واليوتيوب .. وعفويتك تشد الواحد غصب … وياريت اعرف كيف تعلمتي التصوير ماشاء الله .. اتمنى لكك سنه مليئة بالانجازات واالابداع والاجتهاد … موفقه ..

    Like

    1. اضواء القلب و هل يخفى القمر يسعدلي قلبك بس ، سعيده ان الموضوع وسع و مدارك تفكيرك و خلاك تفكرين بشكل أوسع و أتمنى ان هالشي يكون فيك دايم و الله يوفقك و يسهلك امورك ي قلبي و يكتب لك أضعاف ما دعتيه ليا يا رب ما انحرم منك مره شكرًا ، و ان شاءالله من عيوني اكتب لكم تدوينة عن التصوير و لا يهمك😘تحياتي لك

      Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s