ديودرنت Louis Widmer و دوف خالي من العطور

بسم الله الرحمن الرحيم

السلام عليكم و رحمة الله و بركاته

بما انه الصيف قرب علينا ايوا الصيف لا يغركم انه احنا في فصل الربيع بس عندنا مافي ربيع على طول صيف لول

فلازم نستعد جسديا للحر و عشان كذا قررت اتكلم عن منتج مهم و اهم شي عندي حتى من واقي الشمس و هوه الديودرنت و طبعا هذه مو اول تدوينه اتلكم فيها عن منتجات مضادات التعرق او المزيلات , لأن شخصيا اشوفها شي مهم بالنسبه لي و مستحيل مستحيل امشي و احس احد يتضايق من ريحتي سواء رائحة فم , ابط , جسم الي يكون. احب اكون مس بيرفكشن

عموما التدوينة السابقه لنفس الموضوع كتبته قبل العام و اتكلمت عنه بالتفصيل عن اسباب التعرق و كيفية الاهتمام بمنطقة الابط فأدخلوا هذا الرابط لو حابين تقراون و تثقفون نفسكم و قبل لا ادخل في صلب الموضوع في شي حابه اتكلم عنه الموضوع هنا 

و هوه كصفتي الأخت الكبيرة و عندي اخوات اصغر مني , بدي اوصل رساله للأخوات الكبار , اذا امكم ما توجه اخواتك الصغار للعناية الشخصيه بالشكل السليم او انها ما تعرف تتعامل معاهم لازم تدخلي في الموضوع , يعني الصراحه اكثر شي يضايقني ان الاخت تكون مهتمه نفسها و اخواتها الي اصغر منها نظافتهم الشخصية معدومه بتاتا البته , صاحبي اختك \ اخوك و علميهم باسلوب بعيد عن الأمر و النهر و الصوت العالي او ما شابه لانه ما راح يفيدهم قد ما راح يعندوا و يتضايقوا منك و ينفرون في نفس الوقت , المراهقين خصوصا يحتاجون عناية تااااامه من نوعها, كفايه انهم في تغيرات جسميه و سيكلوجيه و هرمونيه و يلاحظوا اجسامهم تبداء تتغير فيكونوا في حالة اضطراب فلازم تكونوا جبنهم و تراعونهم و اهم شي اهم شي تغرزوا فيهم العناية الشخصية , لأن الشخص لمن يكون مو حاسس بأمان في مظهره الخارجي و جسمه راح يكون ثقته في نفسه مهزوزه جدا. الموضوع بيكون شوي محرج انك كيف تفتح كلام زي كذا معاهم لكن حبه حبه الين توصلوا للشي الي تبغون تعلمونهم اياه

فمثلا لو اختك | اخوك المراهق , يعانون من رائحه منفره , او ما يعرفون الخ , تعالوا معاهم بطريقة الجذب عن طريق تجيبون لهم بوكس عناية و تغليف حلو او تروحون معاهم الصيدليه و تاخذون رأيهم و تقولوا لهم ايش رايك في هذا المنتج او ذا طيب ايش رايك نجربه سوا , كمان البنات تقدروا تسوو حركه حلوه انكم تسوون يوم عنايه و تحطوا ماسكات مع بعض و تتفرجوا قنوات عاليوتيوب متخصصه بالعنايه  و هكذا يعني , بس عمركم ما تحرجونهم قدام اخوانكم الثانيين , اهلكم , الاقارب , الأصدقاء او ما شابه خلوه شي بينكم و بين بعض زي السر كذا, منها تبنون علاقة ثقة و تفاهم و ارتباط اخوي , و خلوكم قريبين منهم و لا تحسسوهم بالنقص او ما شابه . عموما طولت عليكم في هذا الجزء بس قلت لازم اتكلم عنه لان في ايامي كنت اتمنى يكون عندي اخت اكبر مني تهتم فيا تعلمني الخ فما احب احد يدخل هالتدوينه و ما يستفيد استفادة تامه منه من جميع النواحي , اتمنى ان رسالتي توصل لأكبر عدد منكم و تطبقونها مع اخوانكم و تفيدكم جميعا

اوووووه و يلا نخش على رأيي عن ديودرنت لويس ويدمر < اعتذر اذا ما كان نطقها كذا > عموما هي شركة سويسريه تسوي منتجات للعنايه بالبشره و تعرفت على هالمنتج من حساب صيدلي جلس يتكلم عنه و قلت خلوني اجربه  . المنتج تعليبه غريب و فكرته مو زي الديودرنت التجاريه , و ذكاء مني نسيت اصور المنتج و هوه مفتوح و رميت العلب , عموما اول ما تفتحين الغطاء فيه فتحه قد المسمار و اخر العلبه الجزء الاخير تلفينه الين يطلع المنتج من الفتحه الصغيرة

لويس-ويدمر-علبه

طبعا لا تلفينه بشكل سريع مره لانه حيطلع منتج كثير و تتورطين معاه , قوامه كريمي و فيه رائحه عطريه مو قويه جدا و لا منفره

المنتج خالي من الأكحول و الباربين لكن كله على بعضه صحيح مركب كميائي لكن تم تصنيع من قبل اطباء جلديه و المنتج يعتبر طبي اكثر من تجاري , و سعره عالي بالنسبه لديودرنت , لكن هل يستاهل ؟

قبل لا اجاوب على هالسوأل , احكي لكم عن طريقة استخدامه :

تاخذين جزء منه على اصابعك و تحطيه على الأبط و تحركينه حركة دائريه و خليه , خذي جزء بسيط جدا لأنه كريمي و استني الين يمتصه البشره و بعدها البسي لبسك , حيفضل مفعوله لمدة 24 ساعه فقط لا غير و اذا قمتي باي مجهود راح تعرقين بس مو كثير و بدون رائحه مزعجه ابدا بس على طول بعدا و شي طبيعي لازم تاخدي شور و تقشري المنطقه بلطف .

استخدمت هالديودرنت لمدة اكثر من 4 اشهر اخذت علبتين من كثر ما عجبني و غير كذا ارتحت عليه كثير مره و ابد ما سمر لي المنطقة مع انه عطري و ما كان يبقي اثر على ملابسي , و نسيت اوضح انه لمن يمتصه البشره يقلب نوعا ما الى بودر بس مو بشكل كبير و لون الكريم صحيح انه ابيض شفاف لكن ما يخلي الابط لونه ابيض علشان كذا ما ياثر على اللبس و علشان انه يترك هالطبقه لازم تسوي تقشير كل استحمام  , و عجبني في طريقة اخذ المنتج كذا اضمن ان ما يتبكتر المنتج او يتغير فيه شي , مع انه احيانا يطفشني نوعا ما ليس دائما , و فيه عيب اخر انك ما تعرفين متى يخلص المنتج لانه العلبه لونه ابيض و ماهي شفافه و المنتج مو واضح ابدا , و على الرغم من ان سعره عالي بعض الشي لكنه يستحق الأقتناء

دوف

بعد ما خلصت العلبتين رجعت مره ثانيه لديودرنت دوف بس كان الموضوع صدفه اكتشفت اني اشتريته و لا استخدمته , و طبعا هذه مو اول مره اجرب عالديودرنت من نفس النوع ذي ثاني مره

مقارنة ديودرنت دوف ب لويس ويدمر تكاد غير منصفة , ليش ؟

ديودرنت دوف يعتبر تجاري و الاخر طبي

ديودرنت دوف خالي من العطر و لويس فيه عطر

طريقة استخدام ديودرنت دوف معاكسه تماما للويس , بحيث ديودرنت دوف تاخي كل المنتج و تمرريه مباشره على الابط , على عكس لويس ما فيه اي اتصال بين المنتج و البشرة مما يخليه يحافظ على انه ما يتبكتر

ديودرنت دوف بعد فتره من الاستخدام يبداء يتفتت و ممكن كل المنتج يخرج من العلبه نفسها و كمان نفس الجزء الاخير في العلبه ( مكان اللف ) يعلق و يجلس المنتج طالع برى و ما ينزل تحت اما في ديودرنت لويس مافي هالكلام ابدا

ديودرنت دوف تعليبه تجاري اي بمعنى اخر تاخذيه من الرف كذا و ممكن احد يكون فاتحه قبلك اما ديودرنت لويس محطوط في علبه كرتون و معاه كتيب وصف اي لو اي احد فتحه راح تعرفين على طول تعليبهم للمنتج محكم جدا

ديودرنت دوف يجلس مفعوله 48 ساعه اما لويس يفضل 24 ساعه فقط

هل ديودرنت دوف سيء ؟

ما اعتبر ديودرنت دوف سيء لكن اعتبره بديل ارخص لديودرنت لويس بس ما يحل محله بشكل نهائي بالنسبه لي شخصيا , اكره ديودرنت دوف في شي واحد خصوصا لمن اعرق احس يطلع ريحه مو كويس مع العلم انه مكتوب مضاد للتعرق لكن معايا انا هههههههههه ما ينفع هذه الكلمه مشيوله من قاموسي الجسدي و قد جربت ديودرنت دوف برائحة انتعاش و برضه نفس الشي و اخيرا و ليس اخرا كإنسانه معاها وسواس ما احس انه وصل لمعاير النظافه التامه الخاصه فيني , دايما انظف المنتج بعد الستخدام و كمان  نفس قوامه ثقيل ( يعتبر شمعي او زبده ) فيترك اثر على الملابس و يصفر خصوصا الملابس الي لونها ابيض

اخيرا سعر ديوردنت دوف رخيص جدا جدا جدا على عكس ديودرنت لويس ويدمر

و بكذا خلصت بوست اليوم و اخر شي اقوله كل شخص جسمه يتفاعل مع المنتج بشكل مختلف عن الثاني في ناس ممكن ترتاح لديودرنت عن الاخر الامر ما يتعلق بالرخص و السعر بل طريقة تفاعل الجسم مع المنتج فحطوا هالشي في بالكم

اراكم على خير في بوست اخر

تحياتي لكم جميعا

Love ya all

 

Advertisements

Author: alaasblog

Alaasaeed ♑️like Octopus addicted to bags & blogging-graphic designer,Readier,new photographer& founder @alaasparks Jeddah 📩Alaasblog@hotmail.com

2 thoughts on “ديودرنت Louis Widmer و دوف خالي من العطور”

  1. جمممميل التقرير
    بس مالقيت السعر لللويس ويدمر
    انا استخدم مثلك عضوي من ايهيرب بالافندر متعيجزة اروح اكتب اسمه بس جميله

    Like

    1. اهلا نهى نورتي مدونتي و الله ، سعره الصراحه ناسيته و ما حبيت اكتب سعر تقريبي الا لمن أتأكد منه ، منتجات اي هيرب جميله جدا و احلا شي انها عضويه 😻👌🏻

      Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s