2014 in review

أعد موظفو مساعد إحصاءات وردبرس.كوم تقرير 2014 سنوي لهذه المدونة.

فيما يلي أحد المقتطفات:

تسع قاعة الحفلات في دار أوبرا سيدني 2700 شخص. تم عرض هذه المدونة حوالي 8,600 مرات في 2014. لو كانت حفلة موسيقية في دار أوبرا سيدني، فستستغرق رؤية هذا العدد الكبير من الأشخاص لها حوالي 3 عروض مباعة.

إضغط هنا لترى التقرير الكامل

08 اسباب ترغمك لفتح مدونة (للأنستابلوقرز)

@my_215

بسم الله الرحمن الرحيم

و بعد تحية الاسلام

 

تدوينتي اليوم للجميلات الانستابلوقرز او الي حابة تكون انستابلوقرز , و الي ما يعرف مين الانستابلوقر بإختصار مدونات قرروا يدونوا عن الاشياء الي يهتموا فيها في برنامج الانستقرام بدل استخدام مدونة

طيب بما اني اتعرفت على انستابلوقرز كثير و الصراحة مجهودهم جدا رائع و جميل, في هالتدوينه حابه اشجعهم و اقنعهم على انهم يفتحوا مدونات فعلية و استخدامها بدل الانستقرام , فالاخير لك حرية الاختيار انا ما أجبرك على شيء لكن حابه  اتكلم عن هالشي بذمة و ضمير ليش ؟ ( لأني امشي بمداء أحب لأخيك ما تحب لنفسك ) 

Continue reading “08 اسباب ترغمك لفتح مدونة (للأنستابلوقرز)”

كيف تصبح مدون ناجح| how to be a good blogger ? 2

قبل قراءة هذا الجزء الرجاء قراء الجزء الآول حتى تترابط افكارك 

الجزء الثاني وصل أدري مرة اتاخرت لكن الحمدلله خلصت من التدوينة بسلام يلا نكمل باقي خطوات كيف تصبح مدون ناجح 
 
4- مظهر المدونة و محتويات اساسية؟
يعتبر مظهر المدونة من الأشياء المهمه في عالم التدوينه فيها راح تساعدك في عدة اشياء
1-      تعكس شخصيتك
2-      تجذب القراء و الزوار ليكي
3-      تخلي الزائر يعرف عن ايش المدونة تهتم و تتحدث فيه
المحتويات اساسية مهمه في مدونتك الا و هيا (هيدر,خلفيه,الخط,الصور,صفحات رئيسية,التسميات,الأرشيف,طرق التواصل)
لمن تجي تشتغلي على تنسيق مظهر المدونة , لازم تهتمي بشكلها فكل ما كان الشكل بسيط كل ما كان اريح لعين القارئ و سهل الوصول لكل شي فيها , الألوان دايم خليها متناسقه و مريحة للعين يفضل دائما تختاري اللون الاسود في الكتابة اما بالمظهر الخارجي من خلفيات  و الخ ابدعي فيها لكن تكون مريحة جدا يعني ابتعدي عن الألوان الفاقعه  ,الخط يكون واضح سواء لو 
كنتي تكتبي باللغة العربي او الأنجليزي
 
الصورتين دي فقط توضيح للمبتدات الي ما يعرفوا ايش هوه الهيدر و الخلفيه و الخ 
الشكل الافتراضي
 
 
 
5-ايش و كيف ابداء اكتب في مدونتي ؟ و بأي لغة اكتب ؟
هذي الخطوة تعتبر تكملة للخطوة الاولى (-ليش بدي افتح مدونة و ايش اهدافي  منها ؟ و مين الفئة المستهدفة؟)  فإذا كتبتي اهدافك و عرفتي مين فئتك المستهدفه فراح تسهل عليكي ,لكن يوجد بعض الاشياء الي لازم تعرفيهم لمن تكتبي تدوينة :
·         ابدئي بكتابة الاشياء المهمه او الاسئلة المهمه لجذب القارئ انو يكمل قراءة التدوينة .
·         دائما اكتبي المختصر المفيد لتدوينتك و من غير ما يكون الكلام دش (كلام كثير) و ملخبط, و لو كان الكلام كثير و شايفتوا مهم فجزئي تدوينتك
·         لا تبخلي في معلوماتك مثلا تقولي هذا سر ليا لأنو بكذا انتي راح تجرحي مصداقية مدونتك و جودتها و اذا انتي من هذا النوع فلا تفتحي مدونة , بالأخص لمن تكون التدوينات على منتجات و الخ لازم تكوني صادقة سواء كان منتجات كويسه او لا ، شوفي كيف الغرب ما يبخلوا في معلومة ليهم عشان كدا يكسبوا حسن السمعه و الشهره كمان لأنهم كانوا صادقين ،و في منهم كذابين لكن ما في احد كامل في منهم و يسوو دعاية عشان الفلوس ، المهم كوني صادقة في الشي الي تسويه.
·         استخدمي الصور في تدويناتك لانو تجعل فيها حياة اكثر ، لكن صور بجودة كويسة و مو صغييييرة و لا كبييييرة مرة لازم تراعي شكل المدونة كمان (أحيانا تخرج الصور عن ايطار محتوى التدوينة فيكون شكلها مو كويس )
·         بأي لغة تكتبي؟ هذا امر قراره راجع لك انتي لآنو الكل ما اتفق على هذا الشيء، فلو كنتي تفضلي اللغه العربية 
و تتقنيها فأكتبي بيها و العكس صحيح
 
 
6- كيف اخلي الناس تزور مدونتي و تقراء مواضيعي؟
هذي ابسط خطوة في عالم التدوين ما اعرف ليش ناس كثير مستصعبينها، فمع مواقع التواصل الآجتماعيه سهلت علينا اشياء جدا كثيرة يعني ابدا و مو شرط تعملي تبادل اعلاني و ما ادري ايش كل الي عليكي تفتحي لك حساب في تويتر انسقرام قوقل+ و الخ  بأسم مدونتك و اكتبي و حطي هاش تاق و الناس راح تستدل فين مكان مدونتك
نقطة مهمه| لمن تفتحي حساباتك في مواقع  التواصل الاجتماعية خلي الاسم على اسم مدونتك و حطي رابط مدونتك في ملفات التعريف .
 
7- ايش اسوي بعد كدا؟!
خلاص بعد ما طبقتي كل الخطوات السابقة هل كذا بمعناته انك وصلتي للي تبغي راح اقولك ايوا لكن في امور لازم تتذكريها و تهمي فيها و هيا:
·         استمري في التدوين و لا تقطعي فجئة و فترة مطولة لآنو بمجرد انقطاعك راح يقل تواجد الزوار
·         دائما تميزي في مواضيعك و خلي عندك طابعك الخاص هذي مدونتك و عالمك الخاص بلا قيود و لا إجبار
·         اذا كان عندك القدرة المادية اعملي مسابقات و جوائز عشان الناس تنجذب لمدونتك  (ملاحظه سويها لمن تكون مدونتك نشطة)
 
– الخلاصة
في الاخير حابه اقولك انو التدوين  مو سهل زي كل الناس تفكر التدوين محتاج صبر و طول باااال، الهام ،صدق ،عطاء ،حرفه .
اهم شي حققي هدف مدونتك و اهتمي بمظهرها و بالمثل مواضيعها ، لا تهتمي بالنقد السلبي و الاسلوب البذيء الي راح تسمعي من الناس ، دائما اعتبري مدونتك هوه عالمك الخاص تسوي فيه الي تبيه باسلوب راقي و لا ينافي تعاليمنا الاسلامية و الخلقيه , اذا كان هدفك من التدوين مجرد ربح وشهره و اخذ هدايا و عمل دعايه لمنتجات و الخ من غير ما تكوني مجربتها فإبتعدي عن التدوين لأنو دي الاشياء تجي من نجاحك و شطارتك, حاولي تشركي القارىء معاكي في تدويناتك لا تكوني جامدة و لا مطفشه (خير الامور اوسطها), ثقي في نفسك و ألهمي الاخرين معاكي , لا تتكلمي في شي و تخصص انتي ما لك فيه اي تجربه ابدا , اكتبي مصدر لكل صورة و كلام تاخذي عشان تدوينتك و لا تنسبيها لنفسك
و الله يوفقكم و إن شاءالله تكونوا استفدتوا من هذي التدوينة ، و لو عندكم اي استفسار و سوأل و مداخلات أرحب بيها ،ملاحظة ابتداء من الاسبوع الجاي راح اعمل بوست شي يخص عالم التدوين و كمان مفاجئات عديدة انتظروني
 شكرا لكم و احبكم
 
حسابي في تويتر و الانستقرام @Alaasblog 
 
ملاحظة كل الصور الموجودة في التدوينات هيا من تصميمي

Continue reading “كيف تصبح مدون ناجح| how to be a good blogger ? 2”

كيف تصبح مدون ناجح!| how to be a good blogger ?

في الأاونه الاخيرة انتشرت المدونات بشكل كبير و بالأخص مدونات المهتمه بكل ما اهوه جديد في الموضة ,طبعا هذا شي جميل و بادرة رائعة لكن لاحظت بأن اغلب المدونات اصبحت متشابة نادرا ما نلاقي تميز فيها , احصل مدونة او اتنين تتكلم عن الموضه و هما اصلا مو عارفين ايش يعني موضة و جمال ,بإختصار كل يوم اشوف مدونة تفتح لغرض انها بدها مدونة و تلاقي عدد فلورز و تطمح للشهره في عالم النت او بدها مدونة لكن مو فاهمه يعني ايش تدوين

في التدوينة هذي راح اتكلم بخطوات كيف تصبحي صاحبة مدونة ناجحة سواء مدونة متهتمه بالجمال الموضة الرياضة نمط الحياة و الخ و عشان لازم تكون مدونتك و بدايتك في عالم التدوين ناجحة لابد من انك تتبعي هذي الخطوات و تطبقيها بحذافيرها
1-ليش بدي افتح مدونة و ايش اهدافي  منها ؟ و مين الفئة المستهدفة؟
2- اسم و شعار المدونة؟
3-في اي موقع افتح مدونتي ؟
4- مظهر المدونة و محتويات اساسية؟
5-ايش و كيف ابداء اكتب في مدونتي ؟ و بأي لغة اكتب ؟
6- كيف اخلي الناس تزور مدونتي و تقراء مواضيعي؟
7- ايش اسوي بعد كدا؟!
– الخلاصة
 

1- ليش بدي افتح مدونة و ايش اهدافي  منها ؟ و مين الفئة المستهدفة؟

تعتبر اول خطوة مهمه بالنسبة لكل مبتدا في عالم التدوين لأنو زي ما قلت قبل كل يوم نلاقي مدونة مفتوحة لكن من بين كل عشرة نحصل 2 مميزين في مواضيعهم و ما الى ذلك و السر يكمن انو عندهم هدف واضح عندهم رسالة معين ما فتحو المدونة من اجل تدوين عشان الشهره بل من اجل هدف , و تحديد الأهداف شي اساسي و موجود منذ ان ربي خلق القلم فما خلق القلم الا ان يكتب كل اقدارنا و احداثنا و ما خلقنا ربنا الأ عشان نعبده و لا وجد الماء من اجل منظر طبيعي و بس و كمان ما وجدت المدونات من اجل التدوين
عشان كدا لازم تكتبي اهدافك و تحدديه تكتبي خططك اجلسي مع نفسك و جيبي ورقة و قلم و اسئلي نفسك دا السوأل و خليكي صادقة مع نفسك , عشان تكوني صاحبة مدونة مميزة حددي هدفك و اكتبيها في مدونتك عشان كل زائر يعرف ايش الهدف منها و في الخطوة الي بعد كدا راح اشرح لك كيف تكتبيها ,  و لا ما راح تستفيدي من مدونتك ابدا
تختلف الأهداف من شخص الى اخر
في ناس تفتح مدونتها عشان تقضي وقت فراغها في شي مفيد أو من اجل المتعه و هذا شي جميل
في ناس تفتحها من اجل تبادل الخبرات او انها شخص مهتمه بشيء معين و حابه تفيد و تستفيد
ايش ما كان هدفك لازم يكون واضح و رسالتك واضحه
الفئة المستهدفه هذا شيءجدا مهم من خلاله راح تعرفي ايش تكتبي تدوين فمثلا لو كان فئتك انك تتكلمي عن اشياء تخص المراهقيين فراح تكتبي تدوينات تخصهم و بس و لو كان من سن 18 (المراحل الجامعيه و الخ) و ما فوق فراح تكتبي اشياء مهمه و تفيد هذه الفئه العمرية, لأنو لكل فئة عمرية تختلف عن الأخر بمعنى اخر \ شوفي اختك الي عمرها 5 سنين كيف تفكر و الي عمرها 17 سنة كيف تفكر و الي عمرها 23 كيف تفكر كل واحد تفكيرة مختلف عن التاني , اكيد راح تقولوا انو الوضع اختلف و بنات اليوم خصوصا المراهقات تفكيرهم سار زي الكبار و ما ادري ايش لكن حاضرب مثال\ ” لو كتبت تدوينة تتكلم عن حب الشباب مين راح يستفيد اكثر و مين راح يقراها و يتجاوب معاكي  البنات المراهقات ام البنات الي اعمارهم في منتصف العشرينات؟ طبعا المراهقات” , من هذا المنطلق لازم لازم لازم تحددي فئتك المستهدفه عشان تجذبي اكبر عدد ممكن 
من القراء و الزوار ليكي.

2- اسم و شعار المدونة؟

اهم خطوة تسمية المدونة و تعتبر اصعب خطوة و عشان تسهل عليكي سوي (عصف ذهني) برضوا جيبي ورقة و قلم و اكتبي الأشياء الي انتي تحبيها اغاني او افلام تفضليها اسماء تعجبكي صفات فيكي اللون المفضل لكي الخ , بعد كدا كوني جمل معين او كلمة وحدة و وريها لأهلك اصحابك اي احد و شاركي من تحبين في هذي الخطوة لأنو الي يحبك و يعزك دايم يسعى لك بالأفضل, لكن حطي في بالك اشياء معينة
  • ما يكون اسم المدونة طويل او يكون اسم غريب مو مفهوم
  • لو بدك اسم المدونة يكون بالعربي و الأنجليزي يفضل تنقي كلمات تكون متقاربة للمعنى بين اللغتين و اذا كان اسم المدونة مركب اكتر من كلمة انتبهي لمن تترجميهم بالأنجليزي و لا تستخدمي قوقل اذا ما كان عندك اللغه بل ودية عند شخص متمكن من اللغة الأنجليزية
  • حاولي يكون الأسم مميز و في نفس الوقت يلصق في ذهن القارء بحيث يتمكن من انو يتذكر اسم مدونتك بكل سهولة
  • و في خيار اخير بإمكانك تكتبي مدونتك على اسمك و هوه اكثر رسمية

شعار المدونة يعتمد على هدفك من المدونة مو شرط يكون عندك شعار لكن بعضهم يفتحو مدونة و بشعار و تلاقي شعار المدونة حقتهم مستخدم في مشروع ليهم فهذا يساعدهم في عملية التسويق او بعضهم يحبو يحطو شعار لمدونتهم عشان يحطوه كبصمة في صورهم لمن يعملوا تغطية لحدث او مراجعة لاشياء تخصهم و الخ الخ الخ  

لكن عشان تصممي شعار للمدونة لازم تكوني ملمه بعالم الرسم و التصميم الجرافيكس و اذا كان عندك احد مصمم خليه يساعدك اهم شي يكون في ترابط و تناسق معقول بين شعار المدونة و اسمها فمثلا ما تقدري تقولي اسم مدونتي شمس و شعارها قمر او تقولي اسم مدونتي صحراء و الشعار يدل على البحر
 ملاحظةكل ما كان الشعار بسيط و خالي من التعاقيد و واضح كل ما كان افضل و اهم شي انه يجذب الأنظار و مريح و منسق بشكل جميل

3 في اي موقع افتح مدونتي ؟

عشان تفتحي مدونة  يوجد عندك خيارين أما انك تفتحي كمدونة بفلوس او مجاني ، لكن انا أحبذ انك تفتحيها كمدونة مجانية خصوصا اذا كانت تجربتك الأولى حتقولي 
ليش :
v      انتي مؤ متوقعه و متأكدة من نجاح المدونة فكيف تصرفي فلوسك على شي غير متأكدة منو
v      انتي لسى في بداية مشوارك فلا تستعجلي و اخطي كل خطوة بخطوتها
v      راح تأخدي وقت الين تتعودي على تدوين و تعرفي كيف تجذبي زوار و قراء ليها
v      التدوين لازم يكون مستمر فإذا انقطعتي فترة عن التدوين خصوصا و انتي في بدايتك فايش راح تستفيدي من مدونتك الي صرفتي فلوسك عليها و انتي ما راح تستخدميها
طيب ايش هذه المواقع ؟ يوجد ٣ مواقع مختلفة توفر لك فرص الحصول على مدونة مجانية و هيا تعتبر من اشهرها يعني في 
مواقع غيرها بس دي المتعارف عليها و سهل استخدامها و كل موقع واجهة مختلفه عن التأني
اولا:خدمة مدونة بلوجر المقدمة من قوقل تتميز هذا الخدمة بانها سهلة التعامل معاها في تعديل شكل المدونة و وضع بعض الأضافات الي ممكن تحتجيها في مدونتك و عشان يكون عندك مدونة في بلوقر كل الي عليك تعمليه تنشئي حساب في بريد قوقل و بكدا يسير عندك مدونة خاصة فيكي من سلبيات البلوقر انه ما يوجد فيه قوالب كثير الأشكال و متعددة بحيث تتيح لك فرص التميز بشكل مدونتك على عكس خدمات مدونة الوردبريس الي يوجد فيه قوالب لا تعد و بأنماط و اشكال و الوان عديده
 
ثانيا:خدمة مدونة الوردبريس و هيا تعتبر من افضل خدمات المدونات في رأيي و ذلك لعدة اسباب واحد كما ذكرت تعدد القوالب في الوردبريس و المزايا الي تقدمها فيها و الأضافات جدا جميله صحيح انو بعض القوالب بل اغلبها ما تقدري تعدلي فيها لكن تعتبر هذه ميزة جيده في الوردبريس و عشان يكون عندك مدونة في الوردبريس ادخلي موقعهم و سجلي و بكذا حيكون عندك مدونة خاصه فيكي من سلبيات الوردبريس عدم القدرة التامه على التحكم في شكل و مظهر القالب و عشان تعدلي فيه لازم تشتري النطاق الخاص فيكي و اعتقد هذا سبب من الأسباب الي خلتني ارجع للبلوجر و اسيب الوردبريس .
 
ثالثا:التمبلر بالنسبة ليا يعتبر نصف مدونة لأنو فيه خصائص مختلفة عن الوردبريس و البلوجر فمثلا لمن تكتبي تدوينة اي احد يقدر يعمل لها “ريبوست” يعني زي حركة الرتويت في التويتر و يسوو لتدوينتك اعجاب و الخ كمان هذي الحركة موجودة في الوردبريس ما يميز التمبلر انك تقدري تعملي قالب كامل من الألف الى الياء لكن لازم تكون عندك خبرة جباره في عالم الأاكواد و تحرير النصوص اي اللغة الخاصة بالبرمجه و تطوير المواقع
 الخلاصة لازم تتعرفي على دي المواقع و سوي بحث و اختاري الي يريحك لا تسمعي كلام الغير و تجري وراه جربي و احكمي بنفسك لكن انا شخصيا و بحكم تجربتي للثلاث مواقع  افضل لكل مبتداء يستخدم البلوجر عشانوا جدا سهل و خالي من التعقيد و اكثر وضوحا من الوردبريس ,انا حاليا مدونتي على نطاق البلوجر و في عندي مدونة ثانية في الوردبريس لها 6 سنين معايا اذا حابة تطلعي عليها اضغطي هنا.

و بكذا انتهينا من الجزء الأول لهذاه التدوينة اتمنى انها عجبتكم و استفدتم منها لو عندكم اي استفسار او سوأل او اي إضافات شاركوني هيا في  التعليقات ,او صفحتي تويتر , قوقل+ او الأسك اف ام